Казахстанд бүртгэлтэй алт олборлогч Solidcore Resources компани Японд алтны хайгуул хийхэд гурван жилийн хугацаанд 35 сая канад доллар буюу ойролцоогоор 25 сая ам.доллар зарцуулахаар болжээ. Тус компани Канадын Japan Gold Corp.-той стратегийн хайгуулын түншлэл байгуулсан байна.
Japan Gold-ийн мэдээлснээр, түншлэл нь Япон дахь таван хайгуулын талбайг хамарна. Solidcore хайгуулын ажлыг бүрэн санхүүжүүлсний дараа тус бүр нь нэг төсөлд төвлөрөх тав хүртэлх хамтарсан компанийн 49 хувийг эзэмших эрхтэй болно.
Дараагийн шатанд урьдчилсан техник, эдийн засгийн үндэслэл болон банкны шаардлага хангасан техник, эдийн засгийн үндэслэлийг дангаар санхүүжүүлбэл эзэмшлээ үе шаттайгаар 70, дараа нь 80 хувь хүртэл нэмэгдүүлэх боломжтой гэж мэдэгдэлд дурджээ.
Japan Gold нь Японд үнэт металлын хайгуул хийдэг Канадын компани юм. Solidcore Resources өмнө нь Polymetal International нэртэй байсан бөгөөд 2024 онд Орос дахь хөрөнгөө худалдсан. Одоогоор Казахстан дахь алтны төслүүдэд төвлөрч, Астанагийн олон улсын биржид бүртгэлтэй байна.
