МОСКВА, 2026 оны аравдугаар сарын 27 /РИА Новости/. France Football сэтгүүлийн хувилбараар 2025/26 оны улирлын дэлхийн шилдэг эрэгтэйчүүдийн клубээр Францын “Пари Сен-Жермен” шалгарлаа. Тус клуб хоёр улирал дараалан уг шагналын эзнээр тодорч байна.
Шагналын төлөө “Арсенал” (Англи), “Бавариа” (Герман), “Будё-Глимт” (Норвеги), “Фламенго” (Бразил) клубүүд өрсөлджээ.
ПСЖ баг 2025/26 оны улиралд Аваргуудын лигт хоёр дахь удаагаа дараалан түрүүлж, Францын аваргаар тав дахь удаагаа шалгарсан байна. Мөн Тив хоорондын цом, УЕФА-гийн Супер цом, Францын Супер цомыг хүртжээ.
Эмэгтэйчүүдийн шилдэг клубээр “Барселона” шалгарсан байна.
Шилдэг хаалгач
Бильбао хотын “Атлетика” баг болон Испанийн шигшээ багийн хаалгач Унаи Симон улирлын шилдэг хаалгачаар шалгарлаа.
Өнгөрсөн улиралд Симон Испанийн шигшээгийн бүрэлдэхүүнд дэлхийн аварга болсон билээ. Хойд Америкт болсон ДАШТ-ий үеэр тэрбээр 7 тоглолт дараалан хаалгандаа алдаагүй нь тус тэмцээний түүхэн дэх дээд амжилт болж байна.
Шилдэг хаалгачийн шагналын төлөө Матвей Сафонов /Пари Сен-Жермен ба Оросын шигшээ/ Яссин Буну (Аль-Хилал, Марокко), Тибо Куртуа (“Реал”, Бельги), Жоан Гарсия (Барселона, Испани), Грегор Кобель (Боруссиа, Дортмунд, Швейцар), Эмилиано Мартинес (Астон Вилла/Челси, Аргентин), Эдуард Менди (Аль-Ахли, Сенегал), Давид Райя (Арсенал, Испани), Возинья (Шавеш/Коло-Коло, Кабо-Верде) нар өрсөлджээ.
Шилдэг эмэгтэй хаалгачаар “Барселона” багийн испани хаалгач Ката Коль шалгарсан байна.
Шилдэг дасгалжуулагч
Испанийн шигшээ багийн дасгалжуулагч Луис де ла Фуэнте France Football сэтгүүлийн хувилбараар 2025/26 оны улирлын шилдгээр шалгарлаа. Өдгөө 65 настай түүний удирдлага дор Испанийн шигшээ баг дэлхийн хошой аварга болсноос гадна эрэгтэйчүүдийн шигшээ багийн хувьд хожигдолгүй цувралын үргэлжилсэн хугацаагаар дээд амжилт тогтоожээ.
Шилдэг дасгалжуулагчийн шагналын төлөө Испанийн Микель Артета (Арсенал), Унаи Эмери (Астон Вилла), Луис Энрике (ПСЖ) нар болон Бельгийн дасгалжуулагч Венсан Компани (Бавариа) өрсөлдлөө.
Эмэгтэйчүүдийн багийн шилдэг дасгалжуулагчаар “Барселона”-гийн Пере Ромеу шалгарсан байна.
