ВАШИНГТОН, 2026 оны есдүгээр сарын 16 /TASS/. АНУ-ын Конгрессын Төлөөлөгчдийн танхим Ираны эсрэг явуулж буй байлдааны ажиллагааг зогсоохыг Ерөнхийлөгч Дональд Трампаас шаардсан тогтоолыг баталжээ.
Мягмар гарагт явуулсан санал хураалтаар Бүгд найрамдах намынхан олонхыг бүрдүүлдэг Төлөөлөгчдийн танхимын гишүүдийн 220 нь тогтоолыг батлахыг дэмжсэн бол 204 гишүүн эсэргүүцсэнээр уг тогтоол батлагдсан байна.
Уг тогтоол нь эрх зүйн хувьд заавал биелүүлэх үүрэг хүлээхгүй, зөвлөмжийн шинжтэй. Хууль тогтоогчид ийм баримт бичгээр улс төрийн байр сууриа илэрхийлдэг бөгөөд АНУ-ын гүйцэтгэх засаглал үүнийг хэрэгжүүлэхгүй байх эрхтэй юм.
АНУ-ын Үндсэн хуулиар дайн зарлах эрхийг Ерөнхийлөгчид бус, Конгресст олгосон байдаг. Гэсэн хэдий ч сүүлийн хэдэн арван жилд Америкийн удирдагчид хууль тогтоогчдын олгосон гадаад оронд цэргийн хүч хэрэглэх зөвшөөрлийг маш өргөн хүрээнд тайлбарлаж, өмнө нь явуулж байгаагүй цэргийн ажиллагааг эхлүүлэхэд ашиглаж ирсэн байна.
АНУ, Израил хамтран хоёрдугаар сарын 28-нд Ираны эсрэг цэргийн ажиллагаа эхлүүлсэн юм. Зургаадугаар сард Вашингтон, Техран хоёр фронтын бүх шугамд, тэр дундаа Ливанд байлдааны ажиллагааг нэн даруй зогсоохоор тусгасан харилцан ойлголцлын санамж бичиг байгуулсан. Гэвч долоодугаар сарын 8-ны шөнө АНУ-ын тал Ормузын хоолойтой холбоотой хүрсэн тохиролцооны нөхцөлийг зөрчсөн гэж Ираныг буруутган, тус улс руу дахин өргөн хэмжээний цохилт өгч эхэлжээ. Үүний дараа АНУ-ын засаг захиргаа Ираны эсрэг өргөн цар хүрээтэй цэргийн хүч хэрэглэхээ үндсэндээ зогсоож, хориг арга хэмжээ замаар эдийн засгийн шахалт үзүүлэх бодлогод шилжсэн байна.