Хятад улс энэ Мягмар гаригаас Пүрэв гариг (2026.09.15-17) хүртэл Бээжин хотноо 13 дахь удаагийн Шяншань форумыг зохион байгуулж байна. Энэ нь Хятадын зохион байгуулдаг олон улсын батлан хамгаалах, аюулгүй байдлын асуудлаарх томоохон уулзалт юм.
Энэ жилийн форум “Тогтвортой байдлын талаар нэгдсэн ойлголт бий болгож, аюулгүй байдлын засаглалыг хамтдаа урагшлуулах нь” сэдвийн дор болж байна.
Шяншань форум 2006 онд анх зохион байгуулагдсан цагаасаа хойш батлан хамгаалах салбарын шинжээч, эрдэмтдийн албан бус уулзалт байсан. Харин сүүлийн жилүүдэд улс орнуудын төр, засгийн болон цэргийн өндөр албан тушаалтнууд оролцдог олон улсын арга хэмжээ болж өргөжжээ. Тус форумыг Сингапурт болдог Шангри-Ла яриа хэлэлцээний Хятад хувилбар гэж олонтаа нэрлэдэг.
Хятадын Батлан хамгаалах яамны мэдээлснээр, энэ жилийн форумд 100 орчим улс, бүс нутаг, олон улсын байгууллагын төлөөлөгчид оролцож байна. Тэдний дунд сайд болон цэргийн дээд албан тушаалын түвшний 60 гаруй төлөөлөгч байгаа аж.
Форумын үеэр дэлхийн засаглал, бүс нутгийн мөргөлдөөн, далайн аюулгүй байдал, зэвсгийн хяналт, шинэ технологийн цэргийн хэрэглээ, сансрын аюулгүй байдал зэрэг асуудлыг хэлэлцэнэ.
Мөн хаалттай уулзалтуудаар АНУ, Хятадын стратегийн харилцаа, Украины дайн, Ойрх Дорнодын энх тайвны асуудал болон ирээдүйн дайнд хиймэл оюун ухааны гүйцэтгэх үүрэг зэрэг сэдвийг хэлэлцэхээр төлөвлөжээ. Форумын үеэр Хятад улс дэлхийн аюулгүй байдлын асуудлаарх байр сууриа илүү хүчтэй илэрхийлэх төлөвтэй байна. Энэ нь Хятадын олон улсын дипломат нөлөө нэмэгдэж буйтай холбоотой гэж шинжээчид үзэж байна. Шяншань форумын нарийн бичгийн дарга нарын газрын өмнөх захирал Жао Сяожүогийн хэлснээр, энэ жилийн форумын гол онцлог нь Хятадын олон улсын яриа хэлэлцээнд нөлөөлөх чадвар нэмэгдсэн явдал юм.
Түүний үзэж байгаагаар, АНУ-ын бодлогод холбоотон орнуудын эргэлзэх байдал нэмэгдэж байгаа энэ үед Хятад улс энх тайван, хөгжил, харилцан ашигтай хамтын ажиллагааг дэмжиж байгаагаа онцолж байна.
Энэ удаагийн форумд АНУ-ын төлөөлөгчид оролцох эсэх нь мөн анхаарал татаж байна. АНУ-ын төлөөлөгчдийг Пентагоны Хятад, Тайвань, Монголын асуудал хариуцсан захирал Синтия “Занти” Каррас тэргүүлэх төлөвтэй байна.
Өнгөрсөн онд АНУ Бээжин дэх Батлан хамгаалахын атташегаа илгээж байсан. Энэ жил илүү өндөр түвшний төлөөлөгч оролцох гэж байгаа нь хоёр улсын цэргийн харилцаанд чухал гэж үзэж байна. Тус форум нь хоорондоо зөрчилдөж буй улс орнуудын төлөөлөгчдийг нэг дор уулзуулах боломж бүрдүүлдэг. Тухайлбал, өмнө нь Израилийн төлөөлөгч Шяншань форумыг Ираны төлөөлөгчтэй нэг дор уулзаж байсан цорын ганц олон улсын хурал гэж онцолж байжээ. Гэсэн хэдий ч барууны орнуудын төлөөлөгчид харьцангуй бага оролцдог бөгөөд бүс нутгийн зарим улс Хятадад үл итгэх хандлагатай хэвээр байна.