Хуртай зуны өглөө Хүй долоон худгийн торгон ногоон дэнжид туурайн төвөргөөн тал нутгаар цуурайтаж, уяачид хурдан хүлгийнхээ уяа сойлгыг тааруулан, удахгүй болох наадмын өнгө, морьдынхоо шандасыг шинжин хөөрөлдөнө. Ахмад уяачдын заавар зөвлөгөөг сонсон, өв уламжлалаа үргэлжлүүлэн сурч байдаг нь наадмын хамгийн сайхан өнгө төрх юм. Наадам дөхөх тусам айл бүрийн ажил ундарч, эмээл хазаараа янзалж, морьдын дэл сүүлийг засч, наадамдаа бэлдээд тунчиг чөлөө завгүй байх нь наадмын чимэг. Наадмын бэлтгэл гэдэг нь зөвхөн уралдаанд бэлдэх биш, өв соёлоо дээдэлж, монгол ахуйгаа хойч үедээ өвлүүлэн үлдээх үнэ цэнтэй уламжлал билээ.
Гэрэл зургийг Б.Батцагаан