Европын хөлбөмбөгийн клубуудын дундах хамгийн нэр хүндтэй, том тэмцээн болох УЕФА Аваргуудын лиг шийдвэрлэх шатандаа орж байна. Хагас шигшээд шалгарах багууд дөрөвдүгээр сарын дунд гэхэд тодорно. Биднийг дөрвөн сонирхолтой тулаан хүлээж байгаа бөгөөд тус бүр өөрийн гэсэн онцлог түүхтэй.
ПСЖ vs Ливерпуль
Энэ шатны хамгийн анхаарал татсан тоглолтуудын нэг. Мөн хоёр баг өнгөрсөн жилийн шөвгийн 16-д таарч байсан билээ. Тэр үед Францын баг илүүрхэж, улмаар аварга болсон бол энэ удаа цомоо хамгаалах зорилготой. Парисын баг өмнөх шатуудад тун сайн тоглож, Челсиг хоёр тоглолт дараалан бут ниргэсэн.
Харин Ливерпуль Премьер лигт харьцангуй сул ч Аваргуудын лигт илүү сайн тоглож байна. Арне Слотын баг чухал мөчид сайн байж чаддаг нь Галатасарайтай хийсэн тоглолтоос харагдсан. Улирлын дараа Мо Салах багийг орхих нь тодорхой болсон нь багийнхны хичээх шалтгаан болж байгаа бөгөөд “Энфилд”-ийн уур амьсгал Ливерпулийг улам хүчирхэг болгодог.
Барселона vs Атлетико Мадрид
Каталоны баг эргэн формдоо орж, түрүүлэх гол фаворитуудын нэг болоод байна. Ямал, Рафинья, Педри нар гайхалтай формтой байгаа бөгөөд ямар ч хамгаалалтыг сэтэлж чадна. Хэдийгээр хамгаалалт дээр бага зэрэг асуудал бий ч Фликийн тоглолтын хэв маяг нь “Бид нар ч та нар шиг гоол оруулж чадна” гэсэн бразил философийг санагдуулдаг.
Симеонегийн удирдлага дор Атлетико өмнө нь хамгаалалт, сахилга батад тулгуурладаг байсан бол одоо илүү довтолгоонд анхаардаг болсон. Гризманн, Альварес, Сёрлот нар үргэлж аюултай, харин Лукман маш сайн тоглож байна. Тэд саяхан Барселонаг Испанийн цомоос хассан. Яагаад энэ амжилтаа дахин давтаж болохгүй гэж?
Реал Мадрид vs Байерн Мюнхен
Довтолгоонд тулгуурласан философитой хоёр багийн тулаан. Байерн уламжлал ёсоор тэмцээний гол фаворитуудын нэг. Кейнээр ахлуулсан хүчирхэг довтолгоо, өргөн бүрэлдэхүүн, туршлага нь тэднийг маш аюултай өрсөлдөгч болгодог.
Реал Мадрид бол энэ тэмцээний дархан аваргууд. Амжилтаараа тэдэнтэй эн зэрэгцэх байтугай ойртох ч баг үгүй. Тэд хасагдах шатанд улам аюултай болдог. Мбаппе, Винисиус Жуниор нарын довтолгооны хослол маш аюултай. Хэрэв Килиан өвдөгний бэртлээс бүрэн эдгэрвэл тэдний боломж улам нэмэгдэнэ.
Спортинг vs Арсенал
Португалийн Спортинг багийн хэрэгжүүлж буй төслийг магтмаар. Сүүлийн жилүүдэд тус клуб үнэхээр цойлж байгаа. Дасгалжуулагч Аморим нь Манчестер Юнайтед руу явсны дараа ч баг доройтолгүй, Руй Боржесийн удирдлага дор лигийн аварга болж, одоо Аваргуудын лигийн хагас шигшээд анх удаа хүрэхийг зорьж байна. Луис Суарес Гёкэрестэй харьцуулахад арай цөөн гоолтой ч сөрөг довтолгоонд маш аюултай нэгэн.
Арсенал одоогоор Премьер лигийг тэргүүлж байна. Харин яагаад анхны Аваргуудын лигийн цомыг авч болохгүй гэж? Райс, Сака, Райа зэрэг тоглогчидтой энэ баг өмнөх шатуудаа итгэл төгс давсан. Энэ тоглолт бол Европын хамгийн том цомын төлөө өрсөлдөхөд бэлэн гэдгээ батлах боломж.