Германтай залгаа Австрийн хилээс холгүй орших Адольф Хитлерийн төрсөн байшинг лхагва гаргаас албан ёсоор цагдаагийн хэлтэс болгон ашиглаж эхэлжээ. Ингэснээр Австрийн засгийн газар уг байшинг неонацистууд цуглан очдог газар болохоос сэргийлнэ хэмээн найдаж байна.
Браунау ам Инн хотод орших энэхүү уламжлалт хийцтэй том байшин нь хувийн өмчлөлд байсан бөгөөд хөгжлийн бэрхшээлтэй хүмүүст зориулсан буяны байгууллага үйл ажиллагаагаа явуулдаг байжээ. Олон жилийн турш маргаан дагуулсан уг байшинг Австрийн Засгийн газар 2017 онд хуульд заасан журмын дагуу худалдан авч, 2019 онд засварлан шинэчилж, цагдаагийн хэлтэс болгохоо мэдэгдсэн байна.
Засварын ажлаас өмнө уг байшингийн түүхэн ач холбогдлыг илтгэх цорын ганц зүйл нь Маутхаузены бөөнөөр хорих лагериас авчирч, явган хүний зам дээр байрлуулсан “Фашизм хэзээ ч дахин бүү давтагдаг” гэсэн бичээстэй чулуу юм. Уг бичээст Хитлерийн нэрийг огт дурдаагүй бөгөөд уг чулуу одоо ч байрандаа хэвээр үлджээ. Харин барилгын цагаан фасад дээр “Цагдаагийн хэсэг” гэсэн ганцхан шинэ хаяг байрлуулжээ.
