МИЛАН, 2026 оны хоёрдугаар сарын 8 /Xinhua/. “Милан-Кортина 2026” өвлийн олимпын уран гулгалтын багийн төрөлд Америкийн шигшээ баг түрүүлж, аварга цолоо амжилттай хамгааллаа. Японы баг ойрхон оноогоор мөнгөн медаль хүртсэн бол зохион байгуулагч Итали улсын уран гулгагчид гуравдугаар байрыг эзэллээ.
Тэмцээний сүүлчийн төрөл болох эрэгтэйчүүдийн чөлөөт үзүүлбэрийн өмнө Америк, Японы багууд нийт оноогоор тэнцээд байв.
Америкийн од тамирчин Илиа Малинин өөрийн онцлох үзүүлбэр болох дөрвөн эргэлттэй акселийг амжилттай гүйцэтгэж чадаагүй хэдий ч үзүүлбэрийнхээ үеэр хийсэн арагшаагаа эргэлттэй үсрэлтээр үзэгчдийг огшоож чадлаа. Жижиг алдаанууд гаргасан ч 21 настай Малинин 200.03 оноо авч, чөлөөт үзүүлбэрт түрүүлэн багтаа хамгийн дээд 10 оноог авчирснаар АНУ-ын багийн ялалтыг баталгаажуулсан юм.
Шийдвэрлэх үед гулгасан Японы Шүн Сато үзүүлбэрээ бүрэн гүйцэтгэснээр, улирлынхаа хамгийн өндөр оноо болох 194.86-г авч, багаа хоёрдугаар байрт хөтөллөө.
Гурав дахь олимподоо оролцож буй Италийн Маттео Риццо 179.62 оноо авч гуравдугаар байрт шалгарснаар зохион байгуулагч орны багийг медалийн тавцанд гарахад хувь нэмэр орууллаа.
Хосын чөлөөт үзүүлбэрт Японы багийн Рику Миура, Рюүичи Кихара нар улирлынхаа дээд амжилт болох 155.55 оноо авч, өрсөлдөгчдөөсөө илт тасран түрүүлж, багтаа 10 оноо авчирсан юм.
“Бид барагцаагаар 145, эсвэл арай илүү оноо авна гэж зорьж байсан. Харин 155.55 гэдгийг хараад үнэхээр их баярласан. Сэтгэл хөдлөлөө барьж дийлээгүй” хэмээн Миура хэлэв.
Гүржийн уран гулгагч Анастасия Метелкина, Лука Берулава нар 139.70 оноогоор хоёрдугаар байрт орсон бол Италийн Сара Конти, Никколо Мачий нар 136.61 оноотойгоор гуравдугаар байр эзэлсэн байна.
Эмэгтэйчүүдийн чөлөөт үзүүлбэрт “Бээжин 2022” олимпын хүрэл медальт Каори Сакамото 148.62 оноо авч, төрөлдөө тэргүүлэн Японы багт дахин 10 оноо авчирсан юм.
“Энд байгаа тамирчид бүгд алтан медаль хүртэх үзүүлбэр үзүүлсэн. Тиймээс бид ямар өнгийн медаль авах нь чухал биш” гэж Сакамото хэлэв.
Гүржийн уран гулгагч Анастасия Губанова 140.17 оноогоор хоёрдугаар байрт орсон бол Олон улсын тэшүүрийн холбооны Гран-При тэмцээнээс зургаан удаа медаль хүртсэн Америкийн тамирчин Эмбер Гленн 138.62 оноо авч гуравдугаар байрт шалгарч, АНУ-д найман оноо авчирлаа.
“Олимпод анх удаа оролцож буй бидний хувьд багагүй сандарсныг та бүхэн анзаарсан байх. Гэхдээ ганцаарчилсан төрөл эхлэхээс өмнө ийм боломж олдсонд үнэхээр талархаж байна” гэж Гленн онцоллоо.