Үндэсний мэдээллийн агентлаг “Эм Ай Си Си ҮЦК” ХХК (MICC Mongolia International Capital Corporation)-тай хамтран уншигчдадаа долоо хоног тутмын Монголын дотоодын болон олон улсын хөрөнгийн зах зээл, эдийн засгийн тойм мэдээллийг хүргэж байна.
Долоо хоног тутмын хөрөнгийн зах зээлийн болон эдийн засгийн тойм мэдээ
(2026.09.07-2026.09.13)
НЕФТИЙН ҮНИЙН ӨСӨЛТ ИНФЛЯЦЫН ЭРСДЭЛИЙГ ДАХИН НЭМЭГДҮҮЛЖ, ТӨВ БАНКУУДЫН БОДЛОГОД ДАРАМТ ҮҮСГЭЖ БАЙНА
Brent төрлийн нефтийн үнэ есдүгээр сарын 11-нд богино хугацаанд $109.97/баррель хүрч, дараа нь буурсан ч $100-аас дээш түвшинд хадгалагдлаа. Долоо хоногийн дүнгээр Brent-ийн үнэ 8 хувиас дээш өссөн бөгөөд зах зээлд нийлүүлэлтийн тасалдал удаан үргэлжлэх эрсдэл нэмэгдэж байна.
Үүний гол шалтгаан нь АНУ, Ираны мөргөлдөөн үргэлжилж, Ормузын хоолойгоор дамжих нефтийн тээвэр хязгаарлагдсан хэвээр байгаатай холбоотой. Хоолойгоор дамжих урсгал мөргөлдөөнөөс өмнөх түвшний ойролцоогоор тал буюу өдөрт 10 сая баррельд хүрчээ. Үүн дээр Саудын Арабын нефтийг Улаан тэнгис рүү дамжуулах гол East-West хоолой халдлагын дараа хаагдсан нь нийлүүлэлтийн эрсдэлийг улам нэмэгдүүлж байна.
Дипломат шийдэлд хүрэх оролдлого ч тодорхой үр дүнд хүрээгүй байна. Оман улсаас зохион байгуулахаар төлөвлөсөн, Ормузын хоолойгоор тээвэрлэлтийг зохицуулах асуудлыг хэлэлцэх уулзалт хойшлогдсон бөгөөд энэ нь нефтийн нийлүүлэлт хэвийн болох хугацааны талаарх тодорхойгүй байдлыг нэмэгдүүлэв.
Нефтийн үнэ өндөр хэвээр байгаа нь зах зээлийн хувьд зөвхөн эрчим хүчний салбарын асуудал биш болж, инфляц болон төв банкуудын мөнгөний бодлогод шууд нөлөөлөх хүчин зүйл болж байна.
АНУ-д нефтийн өсөлт инфляцын дарамтыг нэмэгдүүлж, ХНС-гийн хүүгийн төлөвт нөлөөлсөн бол Засгийн газрын бондын 10 жилийн өгөөж 5 хувьд ойртсон байна. Иймээс хөрөнгө оруулагчид цаашид нефтийн үнэ, нийлүүлэлтийн нөхцөл болон төв банкуудын бодлогын хариу үйлдлийг голлон анхаарах төлөвтэй байна.
ЕВРОПЫН ТӨВ БАНК БОДЛОГЫН ХҮҮГЭЭ ДАХИН ӨСГӨЖ, ИНФЛЯЦЫН ЭРСДЭЛД АНХААРЛАА
Европын Төв банк (ЕТБ) есдүгээр сарын 10-нд бодлогын гурван гол хүүгээ 25 суурь нэгжээр нэмэгдүүлж, хадгаламжийн хүүг 2.50 хувь, үндсэн дахин санхүүжилтийн хүүг 2.65 хувь, зээлийн хүүг 2.90 хувьд хүргэлээ. Энэ нь ЕТБ энэ онд бодлогын хүүгээ хоёр дахь удаагаа өсгөж буй тохиолдол бөгөөд шинэ түвшин есдүгээр сарын 16-наас хэрэгжинэ.
Хүүгийн өсөлтөд Ойрх Дорнодын мөргөлдөөнөөс шалтгаалсан эрчим хүчний үнийн өсөлт, улмаар инфляцын дарамт нэмэгдэж буй нь голлон нөлөөлжээ. ЕТБ 2026 оны инфляцын төсөөллөө 3.0 хувьд хэвээр үлдээж, 2027 оны төсөөллийг 2.5 хувь, 2028 оныг 2.1 хувь болгон шинэчилсэн байна.
Үүний зэрэгцээ евро бүсийн эдийн засаг 2026 онд 0.9 хувь, 2027 онд 1.4 хувиар өснө гэж ЕТБ төсөөлж байна. Гэхдээ эрчим хүчний үнэ өндөр хэвээр үргэлжилж, нийлүүлэлтийн доголдол удаан үргэлжилбэл инфляцын дарамт нэмэгдэж, цаашдын мөнгөний бодлогын төлөвт нөлөөлөх эрсдэлтэй.
Зах зээлийн хувьд нефтийн үнийн өсөлт инфляцын төлөвийг хүндрүүлж, төв банкуудын хүү бууруулах боломжийг хязгаарлаж болзошгүй байна. Иймээс хөрөнгө оруулагчид цаашид эрчим хүчний үнэ, инфляцын мэдээлэл болон ЕТБ-ийн дараагийн бодлогын шийдвэрт анхаарал хандуулах төлөвтэй байна.
Дэлхийн хөрөнгийн зах зээлийн тойм
Өнгөрсөн долоо хоногт дэлхийн хөрөнгийн зах зээлүүд инфляц, нефтийн үнэ болон өндөр хүүгийн хүлээлтийн нөлөөгөөр нийтлэг буурсан дүр зурагтай байлаа. АНУ-д наймдугаар сарын инфляцын мэдээлэл ХНС-гийн хүү өсгөх хүлээлтийг нэмэгдүүлсэн бол Европ болон Азийн зах зээлд эрчим хүчний үнийн өсөлт, геополитикийн эрсдэл ижил төстэй дарамт үүсгэв. Үүний зэрэгцээ есдүгээр сарын 11-нд Brent нефтийн үнэ $109.97-д хүрч, долоо хоногийн турш 8 хувиас илүү өссөн нь инфляцын эрсдэлийг улам нэмэгдүүлэв. Олон улсын эрчим хүчний агентлаг 2026 оны дэлхийн нефтийн нийлүүлэлтийн бууралтын төсөөллөө өмнөх 4 хувиас 6 хувь буюу өдөрт 5.7 сая баррель болгон нэмэгдүүлсэн байна. Ийм нөхцөлд ойрын хугацаанд зах зээлийн чиглэлийг төв банкуудын хүүгийн шийдвэр, нефтийн үнэ, Засгийн газрын бондын өгөөж болон Ойрх Дорнодын нөхцөл байдал голлон тодорхойлохоор байна.
АНУ-ЫН ХӨРӨНГИЙН ЗАХ ЗЭЭЛ
S&P 500: -0.79%
Dow Jones: -1.01%
Nasdaq: -0.74%
АНУ-ын хувьцааны зах зээл сул байж, S&P 500 0.79%, Dow Jones 1.01%, Nasdaq 0.74%-иар тус тус буурлаа. Хөрөнгө оруулагчдын анхаарал инфляцын мэдээлэл болон Холбооны нөөцийн сангийн дараагийн шийдвэрт төвлөрсөн хэвээр байсан бөгөөд 8 дугаар сарын хэрэглээний үнийн индекс өмнөх сараас 0.4%-иар өссөн нь үнийн дарамт буурах явц удааширч байгааг харуулсан байна. Үүний дараа ХНС 9 дүгээр сарын хурлаар бодлогын хүүгээ 25 суурь нэгжээр нэмэгдүүлэх магадлал зах зээлд ойролцоогоор 85%-д хүрч, 10 жилийн хугацаатай Засгийн газрын бондын өгөөж долоо хоногийн турш 5%-д ойртлоо. Нөгөө талаас, хиймэл оюун ухаантай холбоотой компаниудын эрэлт тодорхой хэмжээнд дэмжлэг үзүүлсэн ч өндөр өгөөж, нефтийн үнэ болон хүүгийн хүлээлт нь нийт зах зээлийн эрсдэлийн дуршлыг хязгаарлав.
ЕВРОПЫН ХӨРӨНГИЙН ЗАХ ЗЭЭЛ
FTSE 100: -1.67%
STOXX Europe 600: -1.58%
DAX 40: -1.81%
CAC 40: -1.12%
Европын гол индексүүд мөн долоо хоногийн турш буурч, FTSE 100 1.67%, STOXX Europe 600 1.58%, DAX 40 1.81%, CAC 40 1.12%-иар тус тус сулрав. Ойрх Дорнодын нөхцөл байдал хурцдаж, Brent нефтийн үнэ $100 орчимд хүрсэн нь эрчим хүчний үнэ болон инфляцын талаарх болгоомжлолыг нэмэгдүүллээ. Европын Төв банк энэ орчинд бодлогын хүүгээ нэмэгдүүлэх шийдвэр гаргасан бөгөөд эрчим хүчний үнэ өндөр хэвээр байвал цаашдын бодлогын төлөвт инфляцын эрсдэл илүү чухал хүчин зүйл болохоор байна. Үүний зэрэгцээ Европын эдийн засгийн өсөлт харьцангуй тогтвортой байсан ч нефтийн үнийн өсөлт, өндөр санхүүжилтийн зардал болон геополитикийн тодорхой бус байдал хувьцааны зах зээлд дарамт үзүүлэв.
АЗИЙН ХӨРӨНГИЙН ЗАХ ЗЭЭЛ
Nikkei 225: -2.42%
KOSPI: -1.22%
CSI 300: -1.26%
SSEC: -1.38%
Азийн зах зээлүүд долоо хоногийн дүнгээр нийтлэг буурч, Nikkei 225 2.42%, KOSPI 1.22%, CSI 300 1.26%, Shanghai Composite 1.38%-иар тус тус унав. Японд иений ханш чангарч, Японы Төв банк бодлогын хүүгээ цаашид нэмэгдүүлэх хүлээлт нэмэгдсэн нь хувьцааны зах зээлд дарамт болсон бол Өмнөд Солонгост өндөр үнэлгээтэй технологийн хувьцаануудын хэлбэлзэл нэмэгдсэн байна. Хятадын зах зээлд АНУ-ын хүү өсөх хүлээлт, өмнөх өсөлтийн дараах ашиг түгжих хөдөлгөөн болон хөрөнгө оруулагчдын болгоомжлол нөлөөлөв. Нөгөө талаас, хиймэл оюун ухаан болон дата төвтэй холбоотой эрэлт зарим технологийн хувьцааг дэмжсэн боловч нефтийн үнэ болон дэлхийн бондын өгөөжийн өсөлт нь бүс нутгийн зах зээлийн нийт гүйцэтгэлийг сулрууллаа.