ОХУ-ын парламентын сонгууль эхэлсэнтэй холбогдуулан санал хураалтын үеэр олон зөрчил гарсан тухай мэдээллүүд гарч байна. Тус улс Баасан гаригт /2026.09.18/ парламентын сонгуулийн санал хураалтыг эхлүүлж, гурван өдөр үргэлжлүүлэн явуулж байна. Энэ нь ОХУ-ын түүхэн дэх анхны дайны үеийн парламентын сонгууль болж буй. Мөн Владимир Путины эрх баригч нам улс төрийн ноёрхлоо хадгалах нь бараг тодорхой гэж ажиглагчид үзэж байна. Учир нь сөрөг хүчний оролцоо бараг үгүй болсон юм.
Саналын хуудсыг урьдчилан бөглөсөн байв
Коммунист намын нэр дэвшигч Олег Михайловын мэдээлснээр, Сыктывкар хотод санал хураах хуудас дээр аль хэдийн Путины тэргүүлдэг “Нэгдсэн Орос” намыг тэмдэглэсэн байсан. Үүнийг андуурал гэж тэрбээр үзэхгүй байна.
Үүнээс гадна:
- Воронеж хотод нэгэн эрэгтэй олон тооны саналын хуудсыг нэг дор саналын хайрцагт хийж буй бичлэг таржээ.
- Санкт-Петербургт санал авах байрны ажилтан 100 орчим саналын хуудсыг хайрцагт бөөнөөр нь хийсэн байна.
- Зарим саналын хайрцгийн лац, битүүмжлэлд асуудал гарсан тухай мэдээлжээ.
- Төрийн өмчит компани болон батлан хамгаалах үйлдвэрийн ажилтнуудад “Нэгдсэн Орос” намд саналаа өгөхийг үүрэг болгож, бөглөсөн саналын хуудсынхаа зургийг удирдлагад илгээхийг шаардсан гэх мэдээлэл гарсан байна.
Самара мужид зарим хүмүүс саналын хуудас барьсаар санал авах байрнаас гарч явсан бол Сахалин аралд ажиглагчдыг санал хураалтыг хянахыг хориглосон. Харин явуулын санал авах байрууд ажиллаж эхэлжээ.
УКРАИНЫ ЭЗЛЭГДСЭН НУТАГ ДЭВСГЭРТ Ч ЗӨРЧИЛ ГАРЧЭЭ
ОХУ-ын хяналтад байгаа Луганск мужийн зарим тосгоны оршин суугчид өөрсдийгөө аль хэдийн “санал өгсөн” гэж бүртгэгдсэн байсныг мэдээд ихэд гайхсан байна. Тэдэнд урьдчилсан санал хураалт явуулсан талаар огт мэдэгдээгүй аж.
Тус мужийн нэгэн сонгогч “Ингэж асуухад бараг ичмээр санагдаж байна. Гэхдээ бид хэнд саналаа өгсөн юм бэ?” гэж ярьжээ. Өөр нэг иргэн “Миний бүртгэлтэй байр дайнд сүйдсэн. Хэн, хэзээ санал өгснийг би огт мэдэхгүй. Энэ бол ичгүүртэй явдал” гэж хэлсэн байна.
Либерал үзэл баримтлалтай “Яблоко” намын нэр дэвшигч сонгуулийн нөхцөл байдлыг “найман удаа дараалан сугалаанд хожсонтой адил” гэж шүүмжилжээ.
Тус нам нь дайныг ил тод шүүмжилсэн цорын ганц улс төрийн байгууллага байсан боловч өнгөрсөн сард ОХУ-ын Дээд шүүхийн шийдвэрээр сонгуульд оролцох эрхээ хасуулсан байна. Ингэснээр сонгогчид Украинд явуулж буй дайныг эсэргүүцсэн нэр дэвшигчдэд санал өгөх боломжгүй болжээ. Мөн дайныг эсэргүүцсэн зарим улстөрч шоронд хоригдсон эсвэл гадаад руу дүрвэхээс өөр аргагүй болсон байна.