Шилдэг тамирчнаа алдана гэдэг аль ч багт хүнд цохилт. Гэхдээ бүр ахлагчаа төдийгүй бүх цаг үеийн хамгийн агуу хөлбөмбөгчнийг үдэх ямар бол? Мессиг алдсанаас хойш Барселона юу туулсан бэ?
Бүх цаг үеийн хамгийн агуу нь
17 настай Лео Барселонагийн үндсэн багтай анх бэлтгэл хийсэн өдөр клубын удирдлагууд үнэхээр гайхширч байв. Тэрбээр дэлхийн шилдэг тоглогчдыг тохуурхаж буй мэт амархан хуурч, дараалан гоол оруулж, Каталоны оддын өмнө огтхон ч сүрдсэн шинжгүй байлаа. Бэлтгэлийн дараа Роналдиньо багийнхандаа тун нухацтайгаар “Энэ хүүхэд надаас илүү болно” гэж хэлсэн гэдэг. Тухайн үед ердөө л залуу тоглогчийг урамшуулах үг мэт санагдсан ч цаг хугацаа түүний зөв гэдгийг нотолсон юм.
Месси Барселонагийн өмсгөлтэйгөөр гайхамшигт карьер бүтээсэн. 672 гоол, 34 томоохон цом, зургаан удаагийн “Алтан бөмбөг”. Каталоны хөгжөөн дэмжигчдийн хувьд аргентин залуу клубын бэлгэ тэмдэг төдийгүй талбай дээр, талбайн гадна ч жинхэнэ шүтээн болсон билээ.
Камп Ноугийн гунигтай салах ёс
Харамсалтай нь Леогийн клуб дэх аялал хоёр талын хүссэнээр өндөрлөсөнгүй. Барселонагийн өр улам нэмэгдэж, Месси цалингийнхаа талыг бууруулахаар зөвшөөрсөн ч түүний шинэ гэрээг лигт бүртгүүлэх боломжгүй байв.
Аргентин од явахыг хүсээгүй. Ялангуяа Камп Ноугоос ийм байдлаар салахыг бүр ч хүсээгүй. Гэвч хамгийн гайхамшигтай түүхүүд ч эцэстээ дуусдаг ажээ.
Мессигээс хойших Барселона
Лео Барсагийн тоглолтод голлох үүрэгтэй байлаа. Тэр зөвхөн хувийн ур чадвараараа гоол оруулаад зогсохгүй, өрсөлдөгчийн талбайн хагаст бөмбөгийг удирдаж, тоглолтын хэмнэлийг тогтоон, довтолгооны чиглэлийг тодорхойлж, багийнхныхаа хөдөлгөөнийг төгс зохион байгуулдаг байсан. Тэр бол Барселонагийн зүрх байв. Месси явснаар каталончуудын дасал болсон тоглолтын хэв маяг нурж, үр дүнд шууд нөлөөлсөн.
2021–22 улирал нь “Блауграна”-гийн хувьд 17 жилийн дараах Мессигүй анхны улирал байв. Ла лигт Реал Мадридад цомоо алдаж, Эзэн хааны цомд шөвгийн 16-д хасагдсан. Аваргуудын лигт байдал бүр дордож, хэсгийн шатнаас гарч чадалгүй Европа лиг руу унав. Шөвгийн наймд Камп Ноуд Айнтрахт Франкфурт-д 2:3-аар хожигдож, Европын аялалаа өндөрлүүлсэн.
Дараагийн улиралд Барселона Ла Лигийн аварга болж, мөн Супер цомын финалд “Лос Бланкос”-ыг буулган авсан. Гэсэн ч Аваргуудын лигт дахин бүтэлгүйтэж, хэсгийн шатнаас хасагдан Европа лигт Манчестер Юнайтедад дийлдсэн.
2023–24 улирал цомгүй, амжилт муутай өндөрлөсний дараа Каталоны клуб шинэ үзэл баримтлалтай, залууст итгэдэг, авторитет бүхий герман дасгалжуулагч Ханси Фликийг авчирсан нь эргэлтийн цэг болов. Тэр мөчөөс “Блауграна” аажмаар сэргэж, Европын хамгийн хүчирхэг багуудын нэг гэсэн статусаа эргүүлэн олж авлаа. Мессигийн явдлын үр дагаврыг даван туулж, ахлагчгүйгээр тоглож сурахад Барселонад гурван урт жил шаардлагатай болсон. Бүх цаг үеийн шилдгийг алдах үнэ цэнэ ийм ажээ.
Ирээдүй гэрэлтэй байна
Алдарт Ла Масиa академи Каталоны клубт шинэ авьяастнуудын үеийг бэлджээ. Пау Кубарси, Фермин Лопес, Ламин Ямал нар Барселонагийн шинэ одод. Ялангуяа Ламин Ямалыг Месситэй байнга харьцуулдаг.
Ламин нэгэн цагт Роналдиньог ардаа орхисон Мессигийн адил Леог давж чадах уу? Үүнийг зөвхөн цаг хугацаа л харуулна. Хамгийн гол нь сая сая Барсагийн фэнүүд ирээдүйгээ дахин итгэл дүүрэн харж эхэлсэн явдал юм.