Евразийн нутгаар 6 мянга гаруй километр аялсны эцэст ган гачиг, элэгдэж доройтсон хөрс, бэлчээрийн талбай багасаж буйгаас амьжиргаа нь улам бүр эрсдэлд орж буй малчдын хэлэх үгийг тээсэн Торгоны замын жингийн цуваа Монголд ирлээ.
Тавдугаар сард Туркээс хөдөлснөөс хойш морин туурайн чимээ Оросын Холбооны Улс, Узбекистан, Казахстан, Киргизстан болон Хятадын нутгаар дамжин ирлээ. Аяллын явцад морьтнууд ширүүн уур амьсгал, доройтож буй бэлчээрт дасан зохицож буй малчидтай уулзжээ. Одоо тэд Улаанбаатар хотод ирж Цөлжилттэй тэмцэх тухай НҮБ-ын конвенцын Талуудын 17 дугаар бага хурлын нээлтэд оролцлоо. Засгийн газрууд, эрдэмтэд, санхүүгийн байгууллагууд, бизнес эрхлэгчид болон иргэний нийгмийн байгууллагууд дэлхийн хатаж хуурайшсан газруудад тулгарч буй хүндрэлийг шийдвэрлэхээр хуран цугларчээ.
Бэлчээрийг сэргээхэд чиглэсэн дэлхий нийтийн хүчин чармайлт нь олон үе дамжин мал аж ахуйгаа эрхэлж ирсэн хүмүүсийн мэдлэг туршлагагүйгээр амжилтад хүрч чадах уу гэсэн асуултыг энэхүү аялал бидэнд тавьж байна.
Зуу гаруй жилийн турш жингийн цуваа алс холын соёл иргэншлүүдийн хооронд бараа бүтээгдэхүүн, санаа оноо, соёлыг эртний Торгоны замаар тээвэрлэж ирсэн. Харин энэ удаагийн аялал нь Евразиас Африк хүртэлх хуурай нутгуудад ган гачиг, бэлчээрийн доройтол газар авч буй энэ үед газар нутгийнхаа үржил шимийг хадгалан, амьжиргаагаа залгуулахаар хичээж буй хүмүүсийн хэлэх үгийг тээн ирж байна.
Тэд COP17-ийн өмнөхөн ирсэн нь газрыг сэргээх амлалтыг бодит ажил хэрэг болгоход чиглэсэн чуулганы зорилтыг тодотгож байна.
Газар доройтол, ган гачиг нь жил бүр дэлхийн эдийн засагт 900 тэрбум ам.долларын хохирол учруулж, дэлхийн газрын 40 хувь болон 3.2 тэрбум хүний амьжиргаанд нөлөөлж байна. НҮБ-ын мэдээллээр, 2000 оноос хойш ган гачиг бараг гуравны нэгээр нэмэгдэж, жил бүр дор хаяж 300 тэрбум ам.долларын хохирол учруулдаг.
