Цэнхэр гаригийн шилдэг хөлбөмбөгчинд очдог заншилтай Баллон д’Ор буюу Алтан бөмбөгийн төлөөх энэ оны 30 нэр дэвшигчид өчигдөр/2026.09.08/ албан ёсоор тодорчээ. Хамгийн гайхалтай нь Месси 20 жил өнгөрсөн ч энэ шагналын төлөө дахин нэр дэвшив.
Тэрбээр хамгийн анх 2006 онд Алтан бөмбөгийн төлөө өрсөлдөж байжээ.
Алтан бөмбөгийн эзэн ирэх аравдугаар сарын 26-ны өдөр Лондон хотноо тодорно. Хэрэв Месси тодорвол энэ нь түүний ес дэх Алтан бөмбөг болох жамтай. Мөн хамгийн ахмад буюу 39 насандаа энэ шагналыг хүртсэн тамирчин болно.
Месси энэ жил Аргентины шигшээ багийнхаа хамтаар дэлхийн аваргын финалд хүрсэн амжилтаараа энэ шагналын төлөө өрсөлдөж байгаа. Гэхдээ хүртэх магадлал бусад хүчтэй өрсөлдөгчдөө бодвол бага.
Түүний мөнхийн өрсөлдөгч Роналдо хамгийн сүүлд 2022 онд Алтан бөмбөгт нэр дэвшжээ.
Энэ жилийн гол өрсөлдөөн Английн Харри Кэйн, Францын Килиан Мбаппе, Испанийн Ламине Ямаль нарын хооронд өрнөх шинжтэй.
Харри Кэйн өнгөрсөн улирал Байерн Мюнхены төлөө нийт 73 гоол оруулж, дэлхийн аваргаас хүрэл медаль хүртсэн. Харин Мбаппегийн хувьд Реал Мадрид болон Францын шигшээ багийнхаа хамтаар гавьтай том амжилт үзүүлээгүй ч нөлөө нь байв.
Мэдээж Ламине Ямаль дөнгөж 19 насандаа бараг бүхий л томоохон тэмцээнүүдэд түрүүлчихлээ. Ид үе дээрээ ч очоогүй байгаа тэрбээр Испанийн хамтаар дэлхийн аваргад түрүүлсэн билээ.
Нэр дэвшсэн 30 тоглогчоос бусад онцлохыг нь дурдвал УЕФА Аваргуудын лигийн аварга Усман Дембеле, дэлхийн аваргын шилдэг залуу тоглогч Пау Губарси, Премьер лигийн оновчтой дамжуулалтын рекордыг шинэчилсэн Бруно Фернандеш, Гүржийн бахархал Хвича Кварацхелия, Английн аварга Деклан Райс, дэлхийн аваргын алтан гоолыг оруулсан Ферран Торрес, дэлхийн аваргын шилдэг тоглогчоор тодорсон Родри тэргүүтэй тамирчид байна.
Эмэгтэйчүүдийн Алтан бөмбөгийн шагнал эргэлзээгүй Барселонагийн тоглогч асан Алексиа Путеллад очих биз. Тэрбээр өнгөрсөн улирал багтайгаа дөрвөн цом хүртэж, түүх бүтээсэн. Харин өдгөө Английн Лондон Сити Лионессес багт тоглож буй.
Алтан бөмбөгийн эзнийг тодруулахдаа хөлбөмбөгөөр дагнан бичдэг спортын сэтгүүлчдийг саналыг авдаг билээ.