ТОКИО, 2026 оны наймдугаар сарын 24 /Kyodo/. Японы Олимпын уран гулгалтын хосын аварга Рику Миура, Рюичи Кихара нар Милан-Кортинагийн наадамд үзүүлсэн дуулиант үзүүлбэрийнхээ дараа өөрсдийнх нь харилцааны талаарх олон нийтийн таамаглалыг эцэслэн сүй тавьснаа ням гарагт мэдэгджээ.
Өвлийн олимпын уран гулгалтын хосын анхны алтан медалийг эх орондоо авчирч, “Рику-Рю” хэмээн хослон дуудагддаг энэ хос дөрөвдүгээр сард болсон тэмцээний дараа зодог тайлах шийдвэрээ зарласан юм. “Бид бие биеэ үргэлжлүүлэн дэмжиж, үзэл баримтлалдаа үнэнч байхын зэрэгцээ алхам алхмаар хамтдаа урагшилна” гэж 24 настай Миура, 34 настай Кихара нар инстаграм хуудсандаа бичжээ.
Кихара мөсөн талбай дээр нэг хөлөө өвдөглөн сууж, Миурад бөгж зүүж өгч байгаа зэрэг хэд хэдэн зураг нийтэлжээ. Хуваалцаж байсан “Аз жаргалтай болон бэрхшээлтэй агшнуудаа” эргэн дурсаад Миура, Кихара нар “Цаг хугацаа өнгөрөх тусам бид бие биеийнхээ амьдралын нэг хэсэг болжээ” хэмээн бичжээ.
Өнгөрсөн хоёрдугаар сард болсон өвлийн Олимпын дараа уран гулгалтын спортоос зодог тайлсан тэд дасгалжуулагчаар ажиллахаас гадна мөсөн дээр үзүүлбэр үзүүлж байна.
Японы баруун нутгийн Хёго мужаас гаралтай Миура болон төв хэсгийн Аичи мужийн уугуул Кихара нар 2019 онд уран гулгалтын хосын спортод хамтдаа хүч үзэхээр нэгджээ.
Милан-Кортинагийн хосын төрөлд Миура, Кихара нар богино хөтөлбөрийн дараа тавдугаар байраас эхлэн чөлөөт гулгалтад дэлхийн дээд амжилт тогтоон алтан медаль хүртэцгээсэн юм.