МАДРИД, 2026 оны тавдугаар сарын 5 /sport-express.ru/. “Реал Мадрид” багийн довтлогч Килиан Мбаппегийн гэмтэл эдгэрсэн тул тэрбээр Ла Лигийн 35 дугаар тойрогт “Барселона”-тай хийх тоглолтод оролцоно гэж El Partidazo de COPE радиогийн суваг мэдээлжээ.
Дөрөвдүгээр сарын 24-нд Испанийн аварга шалгаруулах тэмцээний 32 дугаар тойрогт “Бетис” багтай хийсэн тоглолтын үеэр /1:1/ Мбаппегийн зүүн хөлийн шөрмөс гэмтсэн юм.
Хэвлэлүүдэд бичсэнээр, тэрбээр гэмтлээ эдгээж, нөхөн сэргээх эмчилгээ хийлгэхийн оронд Испанийн жүжигчин эмэгтэй Эстер Экспозито-той хамт Италийн Кальяри хотод цагийг өнгөрүүлсэн нь зарим хөгжөөн дэмжигчид, “Реал”-ын тоглогчдын дургүйцлийг хүргэсэн байна. Мөн зарим мэдээллээр, “Реал”-ын ахлах дасгалжуулагч Альваро Арбелоа хэдийгээр илааршсан ч гэсэн түүнийг гарааны бүрэлдэхүүнд оруулахгүйгээр шийдвэрлэжээ.
“Эль-Классико” гэж нэрлэгддэг “Реал Мадрид”, “Барселона” багуудын тоглолт Улаанбаатарын цагаар 11-ний өглөөний 03.00 цагт эхэлнэ. Одоогийн байдлаар “Реал” баг Испанийн АШТ-ий хүснэгтийн хоёрдугаарт бичигдэж байна. Тэмцээн дуусахад дөрвөн тоглолт үлдээд буй энэ үед мадридчууд хүснэгтийг тэргүүлж буй “Барселона”-гаас 11 оноогоор дутуу явна.
Энэ улиралд Мбаппе нийт 41 тоглолтод оролцохдоо 41 гоол оруулж, 6 оновчтой дамжуулалт өгөөд байна. Үүнээс Ла Лигийн тоглолтуудад 24 гоол, Аваргуудын лигт 15 гоол оруулснаар мэргэн буучдын жагсаалтыг тэргүүлж байгаа юм.