АНУ-ын Флорида мужийн оршин суугч Ивана Лизетт Ортиз гэгч эмэгтэй нэрт дуучин Рианнагийн Лос Анжелес хот дахь гэр рүү гал нээсэн хэрэгт холбогдон шүүхийн өмнө очоод байна. Лос-Анжелес хотын дээд шүүхэд Лхагва гаригт (2026.03.25) болсон хурлын үеэр Ортиз өөрт нь тулгасан “Хүний аминд хүрэхийг завдсан” зэрэг хүнд гэмт хэргүүдийг үгүйсгэж, гэм буруугүй хэмээн мэдэгдэв. Шүүх хуралд Ортиз шар өнгийн хорих ангийн хувцастайгаар биечлэн оролцсон бөгөөд түүний өмгөөлөгч гэм буруугүй гэсэн байр суурийг дахин илэрхийлжээ.
Шүүх хурлыг даргалсан шүүгч Тереза МакГонигл шүүгдэгчийн батлан даалтаар суллагдах барьцаа мөнгийг бууруулах хүсэлтийг хүлээн авахаас татгалзаж, 1.875 сая ам.долларын хэмжээг хэвээр үлдээсэн байна. Прокурорын байгууллагын мэдээлснээр, хэрэг явдал өнгөрсөн Ням гаригийн үдээс хойш Лос-Анжелес хотын Беверли Крест дүүрэгт болсон. Ортиз автомашинаар ирж, дуучны харшийн гаднаас ойролцоогоор 20 удаа гал нээсэн гэж үзэж байгаа юм.
Хэрэг гарах үед Рианна болон түүний хамтрагч, реппер A$AP Rocky нар бага насны гурван хүүхдийн хамт гэртээ байсан. Азаар хэн ч гэмтэж бэртээгүй талаар эх сурвалжууд мэдээлжээ. Энэхүү хэрэг нь олон нийтийн анхаарлыг татаж, алдартнуудын аюулгүй байдал, хувийн орон зайг хамгаалах асуудлыг дахин хөндөж байна. Шүүхийн дараагийн шатны хэлэлцүүлэг хэзээ болох нь одоогоор тодорхойгүй байна.