АНУ-ын цэргийнхэн Ираны өмнөд хэсэгт байрлах пуужингийн байгууламжууд болон мина байршуулахаар завдаж байсан завинуудад цохилт өгчээ. Ираны тэнгисийн цэргийн баазуудын өлгий нутаг Бандар Аббас боомт хотыг АНУ онилсон аж. Энэхүү цохилт нь Ираны хүчний заналхийллээс өөрсдийн цэргүүдээ хамгаалах зорилготой үйлдэл байсан гэж АНУ-ын Төв командлал мэдэгдээд байна.
Бандар Аббасын албаныхан дэлбэрэлтийн чимээ сонссоныхоо дараа мөрдөн шалгалтыг эхлүүлжээ. Ираны эрх баригчид энэ талаар хараахан мэдэгдэл хийгээгүй байна. Ирээдүйд байгуулагдах энхийн хэлэлцээрт энэ цохилт ямар нөлөө үзүүлэх нь тодорхойгүй байна.
АНУ, Ираны хэлэлцээнд бага сага ахиц дэвшил гарсан ч ойрын үед мөргөлдөөнийг зогсоох хэлэлцээ хийгдэхээргүй байна гэж Ираны Гадаад хэргийн яамны хэвлэлийн төлөөлөгч Эсмайл Бакай мэдэгдсэн. Харин АНУ-ын ерөнхийлөгч Дональд Трамп өнгөрсөн амралтын өдрүүдээр мэдэгдэл хийхдээ “Би хэлэлцээчиддээ яарах хэрэггүй гэж хэлсэн” гэжээ.