Филадельфи хот харх, хулганатай тэмцэх менежер томилжээ

Харх, хулганатай тэмцэх тусгай менежер томилжээ

АНУ-ын Филадельфи хотод харх, хулганын тархалттай тэмцэх ажлыг эрчимжүүлэхээр тусгай менежер томилжээ. Тус хотод жил бүр мэрэгч амьтадтай холбоотой 4000 орчим гомдол ирдэг аж.

Хотын Эрүүл мэндийн газраас мэдээлснээр, тусгай менежерээр Адриан Жордан томилогдсон бөгөөд тэрбээр харх, хулгана ихээр тархсан хорооллуудад ажиллах эрүүл ахуйн байцаагчдын багийг удирдах юм. Байцаагчид айл өрхүүдэд очиж, мэрэгчдийн тархалтын нөхцөл байдлыг шалгах, устгах арга хэмжээ авах, цаашид дахин тархахаас сэргийлэх зөвлөгөө өгөх ажээ.

Филадельфи хотод жил бүр харх, хулганатай холбоотой 4000 орчим гомдол бүртгэгддэг бөгөөд шалгалтаар тэдгээрийн 2000 гаруй нь батлагддаг байна. Ийм тохиолдолд холбогдох байгууллагууд арга хэмжээ авч, мэрэгчдийн тархалтыг хязгаарладаг аж.

Мөн Жордан хотын Ус хангамжийн газар, Ариун цэвэр, хог хаягдлын алба, Гудамж талбайн алба зэрэг нийт таван байгууллагын үйл ажиллагааг уялдуулж, хамтын ажиллагаа шаардсан асуудлыг зохицуулах үүрэг хүлээжээ. Филадельфи хот харх, хулганатай олон жилийн турш тэмцэж ирсэн түүхтэй. Тухайлбал, 1900-аад оны эхээр хотын эрүүл мэндийн байгууллагууд зориулалтын цэгт үхсэн харх авчирсан иргэн бүрд таван цент олгодог байжээ.

Урьдчилан сэргийлэх арга хэмжээнд анхаарч байна

Харин өнөөдөр хотын удирдлагууд мэрэгчдийг устгахаас илүүтэй урьдчилан сэргийлэх арга хэмжээнд анхаарч байна. Иргэдэд хогоо сайтар тагладаг төмөр саванд хадгалах, харх үүрлэх боломжтой газруудыг цэвэрлэх, байшингийнхаа эргэн тойронд 1.27 сантиметрээс том нүх, завсрыг битүүлэхийг зөвлөжээ. Хотын ариун цэврийн байгууламжийн аюулгүй байдалтай холбоотой уур амьсгалын өөрчлөлтөд тэсвэртэй ус хангамж, ариун цэврийн байгууламжийн заавар хэлэлцсэн байна.

Түүнчлэн харх, хулгана үзэгдсэн тохиолдолд холбогдох байгууллагад мэдээлэхийг иргэдэд уриалж байна. Ингэснээр байцаагчид тухайн газарт шуурхай шалгалт хийж, шаардлагатай арга хэмжээг авах боломжтой юм.

ЭХ СУРВАЛЖ: KAZINFORM