Хөлбөмбөгийн алдартай тоглогчид бизнесийн салбарт хэрхэн амжилт гаргасан талаар танилцуулъя.
Пеле: Мөнхийн брэнд
Пеле бол өөрийн нэрийг дэлхийн хэмжээний брэнд болгож чадсан анхны тамирчдын нэг. 1975 онд тэрээр Нью Йорк Костос багт эргэн ирж тоглохдоо их хэмжээний мөнгө авсан. Зодог тайлсныхаа дараа тэрээр сурталчилгаанаас тогтмол орлого олж, “Puma”, “Pepsi”, “Emirates” зэрэг компаниудтай хамтран ажилласан.
Мөн “Café Pelé” нэртэй кофе брэндийг эзэмшиж, өөрийн дүр төрх, нэрийг удирддаг “Sport 10” компанитай байсан бөгөөд гарын үсэг, дүрс нь олон оронд албан ёсоор бүртгэгдсэн. Түүний нэрээр хөлбөмбөгийн бөмбөг, хувцас, гутал, тусгай цаг зэрэг олон бүтээгдэхүүн гарч байв.
Төрөл бүрийн тооцоогоор Пеле зодог тайлсныхаа дараа жилд хэдэн арван сая ам.долларын орлого олж байсан. Өнөөдөр ч түүний нэр орлого авчирсаар байгаа бөгөөд Неймарын гэр бүлийн эзэмшлийн “NR Sports” “Pelé” брэндийн эрхийг худалдан авч хөгжүүлж байна.
Роналдо: Спорт, санхүү, энтертайнмент
Роналдо Назарио өөрийн бизнесүүдийг “R9” брэндийн дор нэгтгэн экосистем болгож удирддаг. Үүнд покерын тэмцээн дамжуулдаг “Ronaldo TV” (PokerStars-тай хамтран), “Oddz Network” энтертайнмент холдинг, “Octagon Brasil” зар сурталчилгааны агентлаг, “Beyond Film” стартап, “Gestão Patrimonial” санхүүгийн менежментийн компани, мөн “Fundação Ronaldo” буяны сан багтдаг.
2011 онд тэрбээр “9ine Sports & Entertainment” компанийг байгуулж, Неймар зэрэг оддын гэрээг удирдаж, дараа нь контент үйлдвэрлэл, спортын арга хэмжээ зохион байгуулах чиглэлд ажилласан.
Мөн тэрбээр Крузейро болон Реал Валладолид клубуудын хяналтын хувьцааг эзэмшиж байсан.
Кларенс Сийдорф: Япон хоол
Кларенс Сийдорф талбай дээрх амжилтаас гадна рестораны бизнест амжилттай орсон. Тэрбээр 2004 оноос хойш тогооч Роберто Окабэтэй хамтран Япон-Бразил хэв маягийн “fusion” хоолны “Finger’s” рестораны сүлжээг хамтран эзэмшиж байна.
Дони: Барилга
Дони бизнесийн сонирхолтой замыг сонгосон. 2013–2014 онд хоёр удаа зүрхний шигдээс туссаны дараа АНУ руу нүүж, “D32 Invest” барилгын компани байгуулсан бөгөөд өнөөдөр ойролцоогоор 20 сая ам.долларын үнэлгээтэй болсон.
Түүний удирдлага дор 3000 орчим байшин баригдсан бөгөөд мөн фитнесс клуб, хөлбөмбөгийн агентлаг, зугаа цэнгэлийн парк, спортын төв эзэмшдэг.
Андреа Пирло ба Андрес Иньеста: Дарсны үйлдвэрлэл
Андреа Пирло болон Андрес Иньеста нар зодог тайлсныхаа дараа дарсны үйлдвэрлэлд хүч сорьж байна. Пирло 2007 онд Брескиа хотын ойролцоох “Pratum Coller” дарсны үйлдвэрийг худалдан авч, жилд 15–20 мянган шил дарс үйлдвэрлэдэг гэр бүлийн жижиг бизнес эрхэлж байна.
Харин Иньеста 2010 оноос “Bodega Iniesta” брэндийг хөгжүүлж, эхэндээ 10 га талбайд усан үзэм тариалж байсан бол одоо 300 орчим га талбайтай, 14 төрлийн усан үзмийн сорт бүхий томоохон аж ахуй болж өргөжсөн.
Мөн тэрээр “FirstVision” компанид хөрөнгө оруулж, тоглогчдын өмсгөл дээр камер суурилуулан тоглолтыг “анхны хүний өнцгөөс” үзүүлэх шинэ технологи хөгжүүлж байна.