Алтны үнэ өнөөдөр /2026.05.26/ буурсан нь газрын тосны үнэ өссөнтэй холбоотой гэж “WAM” агентлаг мэдээлэв. Мөн инфляц болон хүүгийн түвшин урт хугацаанд өндөр хэвээр байна гэх болгоомжлолыг төрүүлж байна. Спот алтны үнэ нэг унц нь 0.6 хувиар буурч, 4,542.20 ам.доллар болсон байна. Харин АНУ-ын зургадугаар сард нийлүүлэх алтны фьючерс үнэ 0.4 хувиар өсч, 4,542.80 ам.долларт хүрчээ.
Спот мөнгөний үнэ 1.6 хувиар буурч нэг унц нь 76.84 ам.доллар болсон бол цагаан алтны үнэ 0.8 хувиар унаж 1,952.56 ам.доллар, палладийн үнэ 1.2 хувиар буурч 1,381.27 ам.доллар болсон байна. Мэдээллүүдэд дурдсанаар, хөрөнгө оруулагчид АНУ болон Ираны энхийн хэлэлцээнд ахиц гарах боломжийг үнэлж байгаатай холбоотойгоор ам.долларын ханш суларчээ.