Ираны мөргөлдөөн болон бүс нутгийн хурцадмал байдал нэмэгдэж буйтай холбогдуулан газрын тос тээвэрлэгч зарим усан онгоц маршрутаа өөрчилж байгаа талаар тээврийн зуучлагч компани мэдэгдэв. Токиод төвтэй Атлас компани гадаадын далбаатай зарим газрын тосны танкер одоо Ормузын хоолойгоор дамжин өнгөрөхийн оронд Улаан тэнгисээр явж байгаа гэж мэдээлж байна. Энэ нь Ормузын хоолойг хэт эрсдэлтэй зам гэх болгоомжлол нэмэгдсэнийг илтгэж байна. Саудын Арабын баруун эрэгт орших Янбу боомтоос хоёр долоо хоногийн өмнөөс эхлэн газрын тосны танкерууд илүү хол маршрут сонгож эхэлжээ. Гэсэн хэдий ч энэ зам нь мөн адил эрсдэлтэй. Тухайлбал, Улаан тэнгисийн ойролцоо Хусит хөдөлгөөний халдлагад өртөх вий гэж болгоомжилж байна. Үүнээс болж Японы зарим тээврийн компаниуд Улаан тэнгис болон Адены булангаас бүрэн зайлсхийж байна.
Атлас компанийн ерөнхийлөгч Ёшинобу Такенака хэлэхдээ, мөргөлдөөн эхэлсний дараа илүү олон компани Саудын боомт болон өөр маршрутуудыг ашиглаж эхэлсэн гэжээ. Тэрбээр мөн тээврийн зардал өндөр байгаа нь Европын болон Хятадын компаниудыг Улаан тэнгисийг ашиглан илүү их эрсдэл хүлээхэд хүргэж болзошгүйг онцолсон байна.