“Формула-1” авто уралдааны 2026 оны дэлхийн аварга шалгаруулах тэмцээний 19 дэх гараа болох Мексикийн Гран-Пригийн байрлал тогтоох уралдаанд “Феррари” багийн британи уралдаанч Льюис Хэмилтон түрүүлжээ. Тэмцээн Мехико хот дахь ах дүү Родригесийн нэрэмжит уралдааны замд арван нэгдүгээр сарын 1-нд үргэлжилж байна.
Байрлал тогтоох уралдаанд “Мерседес” багийн британи уралдаанч Жорж Расселл хоёрдугаар, “Феррари” багийн Монакогийн уралдаанч Шарль Леклер гуравдугаар байрт орлоо.
Хэмилтоны дээд амжилт
Хэмилтон 2023 оны долдугаар сард Унгарын Гран-Прид байрлал тогтоох уралдаанд түрүүлснээс хойш анх удаа энэ амжилтыг давтлаа. Ингэснээр тэрбээр үндсэн уралдааныг хамгийн урд байрлалаас буюу поул-позишнээс эхлүүлэх эрхийг нийтдээ 105 дахь удаагаа авч, “Формула-1”-ийн дээд амжилтаа ахиуллаа.
Антонеллид аварга болох боломж
Италийн уралдаанч Кими Антонелли байрлал тогтоох уралдаанд тавдугаар байр эзэлсэн. Түүнд энэ удаагийн үндсэн уралдаанд есдүгээр байрт орход л анх удаагаа дэлхийн аварга болоход хангалттай. Антонелли дэлхийн аваргын төлөөх өрсөлдөөнд тэргүүлж байгааг бид өмнө нь мэдээлсэн.
Үндсэн уралдаан Москвагийн цагаар 23:00 цагт, Улаанбаатарын цагаар арван нэгдүгээр сарын 2-ны 04:00 цагт эхэлнэ.
