Яг нэг жилийн өмнө буюу 2025 оны есдүгээр сард The MongolZ дэлхийн шилдэг CS2-ийн баг болж, Valve болон HLTV-ийн чансааг хоёуланг нь тэргүүлж байлаа. Харин өнөөдөр тэд хаана явж байгаа болон өвлийн Mэйжорт түрүүлэх боломж хэр байгаа талаар хүргэе.
БҮРЭЛДЭХҮҮНИЙ ӨӨРЧЛӨЛТ БА ЭНЭ УЛИРЛЫН ҮР ДҮН
The MongolZ 2025 онд гайхалтай амжилт үзүүлж, Остин Мэйжорын финалд шалгарч, Esports World Cup 2025-д түрүүлсэн. Гэвч үүний дараа багийн шилдэг тоглогч “Senzu” явсан. Улмаар 2026 оны эхний хагаст түүний оронд cobrazera” тоглосон билээ.
Гэвч шинэчлэгдсэн бүрэлдэхүүн өнгөрсөн жилийн амжилтад ойртож чадсангүй. Тэдний хамгийн өндөр амжилт нь PGL Bucharest 2026-д гуравдугаар байр, PGL Cluj-Napoca 2026-д дөрөвдүгээр байр эзэлсэн явдал байв. Харин энэ оны эхний Кёльн Мэйжорт The MongolZ баг 2024 оноос хойш анх удаа плей-оффт шалгарч чадсангүй.
Ийнхүү багт дахин өөрчлөлт хийх шаардлагатай болсон бөгөөд удирдлагын зүгээс бүрэлдэхүүндээ шинэчлэл хийв. Багийн од “mzinho” олон улсын бүрэлдэхүүнтэй багт нэгдэхээр явж, “cobrazera” сэлгээнд шилжсэн. Тэдний оронд академийн түвшинд тоглож байсан хоёр залуу тоглогчийг авчирснаар бүрэлдэхүүнээ бүхэлд нь монгол тоглогчдоос бүрдүүлсэн хэвээр үлдсэн.
Шинэ бүрэлдэхүүнтэй хийсэн эхний хоёр тэмцээндээ The MongolZ баг BLAST Bounty 2026 Season 2 Finals болон Esports World Cup 2026-ын плей-оффт шалгарсан ч аль алинд нь хасагдах шатны эхний тоглолтод ялагдал хүлээв.
АСУУДАЛ ЮУ ВЭ?
2025 оны амжилтыг санаж буй хөгжөөн дэмжигчид The MongolZ-оос илүү өндөр амжилт хүлээж байгаа нь гарцаагүй. Гэхдээ Монголын цахим спортын тамирчид одоогоор оргил түвшиндээ хүрч чадахгүй байгаа хэд хэдэн шалтгаан бий.
Эхлээд эерэг зүйлээс нь эхэлье. The MongolZ үндсэн цөм бүрэлдэхүүнээ хадгалж чадсан. Багийн ахлагч “bLitz”, мэргэн буудагч “910”, Содбаяр “Techno” болон дасгалжуулагч “maaRaa” нар багтаа үлдсэн.
Ийм туршлагатай үндсэн бүрэлдэхүүнтэй байгаа нь шинэ тоглогчдыг багийн тактикийн системд дасан зохицоход ихээхэн давуу тал болно. Шинэ тоглогчдын гол үүрэг бол өөрийн тоглолтыг гаргаж, сайн буудах. Тэдний эхний тоглолтууд ч дэлхийн шилдэг өрсөлдөгчидтэй эн тэнцүү өрсөлдөж, цаашид од тоглогчдын хэмжээнд хүрэх боломжтойг харуулсан.
Харамсалтай нь шинэ тоглогчид дебютээ хийж байх үед “maaRaa” хувийн шалтгааны улмаас хоёр тэмцээнд оролцож чадаагүй. Чухал үед байсан. Учир нь шинэ тоглогчдод яг одоо тактик, стратеги болон сэтгэл зүйн хувьд аль болох дэмжлэг хэрэгтэй байна.
Гэхдээ maaRaa дараагийн тэмцээнээс багтаа эргэн ирж, шинэ тоглогчдоо багийн системд уусгах үйл явцыг удирдана. Одоогоор энэ үйл явц багагүй хугацаа зарцуулж байгаа нь харагдаж байна.
Цаг хугацаа өнгөрөхийн хэрээр The MongolZ-ийн шинэ тоглогчид туршлага хуримтлуулж, багийн томоохон ивээн тэтгэгчдийн нэг болох 1xBet-ийн дэмжлэгтэйгээр өсөн хөгжих боломжтой аж. Монголын багийн хөгжөөн дэмжигчдийн хувьд тэдний хөгжил, дасан зохицох үйл явцыг тэвчээртэй хүлээх л үлдэж байна.
ДЭЛХИЙН №1-ИЙН ТӨЛӨӨ ӨРСӨЛДӨЖ БУЙ БУСАД БАГУУД ЯМАР БАЙНА ВЭ?
The MongolZ-ийг шүүмжлэхээсээ өмнө дэлхийн топ 10-т багтдаг бусад багууд хэрхэн тоглож байгааг харах нь зүйтэй. Зуны амралтын дараа болон багуудын хийсэн солилцоо, наймааны үеэр дэлхийн тэргүүлэх багууд формондоо орж чадаагүй явна. Фаворит багуудын гаргасан үр дүнг өөрөөр тайлбарлахад хэцүү.
2025 оны хоёр Мэйжор тэмцээнд хоёуланд нь түрүүлж, энэ улирлын эхний хагаст дийлдэшгүй байсан Team Vitality Кёльн Мэйжорын плей-оффын эхний тоглолтдоо хожигдож, EWC 2026-д ердөө 5-8 дугаар байр эзэлсэн бөгөөд BLAST Bounty 2026 Season 2-д оролцох эрхээ ч авч чадсангүй.
Team Falcons анхны Мэйжор тэмцээндээ түрүүлэхдээ аз түшсэн гэлтэй. Тэд BLAST Bounty 2026 Season 2-д оролцож чадаагүй бөгөөд дараа нь EWC 2026-ын шөвгийн наймд Бразилын Legacy багт хожигдсон.
Team Spirit мөн BLAST Bounty 2026 Season 2-ын финалд харьцангуй сул өрсөлдөгч болох MOUZ-д хожигдсон ч EWC 2026-д FUT Esports-ийг арайхийн буулган авч түрүүлсэн. Тухайн үед FUT баг Valve-ийн чансааны 14 дүгээр байрт бичигдэж байв.
NAVI, FURIA, MOUZ болон бусад тэргүүлэх багууд ч тогтвортой тоглож, формоо олоход бэрхшээлтэй байна. Ингэснээр олон улсын тавцанд одоогоор илт давамгайлсан фаворит баг алга. Тиймээс The MongolZ-ийг оролцуулаад дэлхийн топ 20-д багтаж буй бараг бүх баг Сингапурын Мэйжорт түрүүлэх бодит боломжтой гэж хэлж болохоор.
Цаашид улирлын үлдсэн хугацаанд багууд хэрхэн тоглох нь ихээхэн зүйлээс шалтгаална. Өрсөлдөгчдөө хэн хамгийн сайн судалж, дасан зохицож, өөртөө итгэх итгэлээ хэн илүү хурдан сэргээж чадна, тэр баг том давуу талтай байх болно.
THE MONGOLZ ЭНЭ ЖИЛ ЯМАР ТЭМЦЭЭНҮҮДЭД ОРОЛЦОХ ВЭ?
The MongolZ арваннэгдүгээр сард болох Сингапурын Мэйжорт формоо олохын тулд хаана тоглож, туршлага хуримтлуулах вэ? Одоогоор тэд дараах тэмцээнүүдэд оролцохоо зарлаад байна.
- FISSURE Playground #3 — есдүгээр сарын 8-13
- PGL Masters Bucharest 2026 — аравдугаар сарын 24-31
- IEM Beijing 2026 — арваннэгдүгээр сарын 2-8
Харин BLAST Rivals Fall 2026 (11-р сарын 11-15) болон Сингапурын Мэйжор (11-р сарын 25–12-р сарын 13)-д оролцох эрх авахын тулд The MongolZ баг арав, арваннэгдүгээр сарын Valve-ийн чансаанд өндөр байр эзлэх шаардлагатай.