Иранчууд Исламын хувьсгалын 47 жилийн ойг тохиолдуулан улс даяар жагсажээ. Тегеран болон бусад хотуудад Лхагва гаригт (2026.02.11) олон мянган хүн жагсаж, Исламын Бүгд Найрамдах Улс байгуулагдсаныг тэмдэглэн, засгийн газрыг дэмжиж буйгаа илэрхийлэв. Олон хүн Дээд удирдагч Али Хаменеи болон үүсгэн байгуулагч Аятолла Рухолла Хомейнигийн зургийг барьж, Иран болон Палестины туг намируулж байв. Зарим нь “Америк үх!”, “Израиль үх!” хэмээн хашхирч байлаа.
Арга хэмжээнүүдийн үеэр жагсагчид Америк болон Израилийн эсрэг байгаа гэдгээ хүчтэй илэрхийлсэн. Зарим газарт хүмүүс тус хоёр орны тугийг шатааж, гишгэлж байв. Хэдийгээр эдгээр жагсаал нь засгийн газрыг дэмжиж буйг харуулах зорилготой байсан ч бүх хүн ижил байр суурьтай биш. Арванхоёрдугаар сарын сүүлээр Ираны мөнгөн тэмдэгт риалын ханш огцом унаж, инфляц өндөр байснаас үүдэн эсэргүүцлийн жагсаал эхэлсэн. Тус жагсаал улс даяар тархаж, засгийн газрын эсрэг хөдөлгөөн болон өргөжсөн. Гэвч дараа нь аюулгүй байдлын хүчнийхэн хүч хэрэглэн тараасан юм.
