Узбекистаны Наманган хотод болж буй Олон улсын цэцгийн 65 дахь фестивалийн хүрээнд нэг сарын дотор хамгийн олон цэцэг тарьсан дэлхийн дээд амжилт тогтжээ. “Guinness World Records”-ийн албан ёсны цахим хуудсанд мэдээлснээр, фестивальд зориулан 29.4 сая гаруй цэцгийг гар аргаар тусгайлан тарьсан байв. Үүний үр дүнд Наманган хот “нэг сарын хугацаанд олон нийт хамтран хамгийн олон цэцэг тарьсан” ангилалд Гиннесийн дээд амжилт тогтоожээ.
Энэхүү сарын турш үргэлжилсэн цэцэг тарих аяныг Наманган мужийн захиргаа Олон улсын цэцгийн 65 дахь фестивалийн хүрээнд зохион байгуулсан байна.
Төслийн зорилго нь хотын цэцэг тариалах уламжлалыг тэмдэглэн алдаршуулах, нийтийн ногоон байгууламжийг сайжруулах, мөн олон хүнийг оролцуулсан утга учиртай олон нийтийн төсөл хэрэгжүүлэхэд чиглэжээ. Фестиваль тавдугаар сарын 24-нөөс долдугаар сарын 12 хүртэл үргэлжлэх бөгөөд зохион байгуулагчдын мэдээлснээр нийт таван сая орчим үзэгчийг татах төлөвтэй байна. Фестивалийн хүрээнд эрдэм шинжилгээний бага хурал, форум, үзэсгэлэн худалдаа, концерт, дроны шоу зэрэг 150 орчим арга хэмжээ зохион байгуулагдахаар төлөвлөгджээ.
Өмнө нь Ташкент хот жил бүр зохион байгуулдаг “Цэцгийн фестиваль 2026”-аа тэмдэглэн өнгөрүүлсэн талаар мэдээлж байсан бөгөөд уг арга хэмжээ нь байгалийн үзэсгэлэн болон орон нутгийн бүтээлч байдлыг харуулсан өнгөлөг баяр болсон юм.