NBA-ийн 2025-2026 оны улирлын тоглолтууд өндөрлөж, плей-офф эхлэх гэж байна. Аль баг гол фаворит вэ, мөн тэдний сул тал юу вэ гэх тоймыг хүргэж байна.
Оклахома Сити Тандер
Аваргаа хамгаалагч Оклахома Сити Тандер 2026 оны плейоффт гол фаворитоор орж байна. Тэдний хамгийн том давуу тал бол өргөн бүрэлдэхүүн, олон талт байдал. Шай Гилжес-Александер, Чет Холмгрен, Жейлен Уильямс гэсэн гурвал довтолгоо, хамгаалалтын аль алинд гайхалтай тоглолт үзүүлдэг. Уильямс улирлын ихэнх хэсгийг гэмтлийн улмаас өнжсөн ч баг нь бүсээ тэргүүлж чадсан. Тэдний хамгаалалт эсрэг багтаа бараг л боломж олгодоггүй.
Сул тал: Самбар доорх будагтай талбайн хүч дутмаг, мөн фаворит багийн дарамт. Шийдвэрлэх мөчид довтолгоо нь хэт ойлгомжтой болох хандлагатай.
Бостон Селтикс
Бостон Селтикс дорнод бүсийн хамгийн тогтвортой баг хэвээр байна. Улирлын өмнө Кристапс Порзингис, Аль Хорфорд, Жру Холидэй нар явж, Жейсон Тэйтум гэмтлээсээ дөнгөж гуравдугаар сард эргэн ирсэн ч баг нь бүсдээ 2-р байрт орсон. Багийн гарааны тавын тоглогч бүр бие даан оноо авч, сайн хамгаалан тоглодог.
Сул тал: Гурван онооны шидэлтэд хэт найдах хандлага. Шидэлт орохгүй үед тоглолт унадаг. Мөн тоглолтын төгсгөлд статик довтолгоо ихэсч, Тэйтум болон Браун хүнд байдлаас шидэлтүүд хийх хандлагатай.
Сан Антонио Спөрс
Сан Антонио Спөрс баг энэ улиралд жинхэнэ өрсөлдөгч болж гарч ирлээ. Үүнд Виктор Вембаньямагийн хурдацтай хөгжил гол нөлөө үзүүлсэн. Тэр ердөө гурав дахь улиралдаа MVP түвшинд хүрээд байна.
Вембаньяма талбай дээр тоглолтын “геометр”-ийг бүрэн өөрчилдөг. Өрсөлдөгчид самбар луу довтлохоос эмээж, алсын шидэлт рүү яарах нь элбэг. Харин довтолгоонд давхар хамгаалалт татах үед Де’Аарон Фокс зэрэг тоглогчдод илүү зай гардаг.
Сул тал: Туршлага дутмаг. Багийн бүрэлдэхүүнд плейоффын өндөр түвшний туршлагатай цорын ганц тоглогч нь Харрисон Барнс.
Детройт Пистонс
Детройт Пистонс сүүлийн хоёр жилд дорнод бүсийн хамгийн том сюрприз боллоо. Тэд 14 ялалтаас 44, улмаар 60 ялалт авч, бүсээ тэргүүлсэн. Кэйд Каннингхэм багийн жинхэнэ удирдагч болж гарч ирсэн.
Түүний Жейлен Дюрен-тэй хослол маш аюултай — хурдан довтолгоо, самбар доорх давамгайлал нь ямар ч хамгаалалтыг эвдэж чадна.
Сул тал: Данкан Робинсон, Тобиас Харрис нараас өөр тогтвортой холын зайн шидэгч цөөн. Плейоффт тоглолт удааширч, зай багасах үед гурван онооны үр ашиг асуудал болж магадгүй. Мөн туршлага дутмаг.