Сансрын нисэгч Жүгдэрдэмидийн Гүррагчаад эх дэлхийдээ эргэж газардсан өдрийг нь тохиолдуулан “Хүндэт профессор” цол олгожээ.
Монгол Улсын сансрын нисэгч, БНМАУ, ЗХУ-ын баатар тэрбээр 1981 оны гуравдугаар сарын 22-ны өдөр “Союз-39” хөлгөөр сансарт нисч, гуравдугаар сарын 30-ны өдөр эх дэлхийдээ эргэж газардсан түүхтэй. Энэхүү түүхт өдрөөс хойш 45 жил өнгөрч, монгол хүн сансарт ниссэний 45 жилийг ойг тэмдэглэж байгаа билээ.
Энэхүү түүхэн үйл явдлыг тохиолдуулан ОХУ-ын Бүгд Найрамдах Буриад Улсын Дорнод Сибирийн Технологи, удирдлагын Улсын их сургуулийн Эрдмийн зөвлөлийн шийдвэрийн дагуу сансрын нисэгч Ж.Гүррагчаад гуравдугаар сарын 30-ны өдөр тус сургуулийн “Хүндэт профессор” цолыг олгожээ.
Цол олгох ёслолын арга хэмжээнд Монгол Улсаас ОХУ-ын Улаан-Үд хотод суугаа Ерөнхий консул Ц.Ганхуяг оролцож, баяр хүргэсэн байна.
