Монгол Улсын Ерөнхийлөгч У.Хүрэлсүх Бүгд Найрамдах Беларусь Улсын Ерөнхийлөгч Александр Григорьевич Лукашенкогийн урилгаар тус улсад төрийн айлчлал хийж байна.
Ерөнхийлөгч У.Хүрэлсүхийг Бүгд Найрамдах Беларусь Улсын Ерөнхийлөгч А.Г.Лукашенко Минск хотын Тусгаар тогтнолын ордондоо албан ёсоор угтаж авлаа. Угтах ёслолын үеэр хоёр улсын Төрийн дуулал эгшиглэж, Хүндэт харуулын захирагч Ерөнхийлөгч У.Хүрэлсүхэд айлтгал өргөлөө. Төрийн тэргүүн нар угтах ёслолд оролцсон хоёр улсын албан ёсны төлөөлөгчидтэй мэндчилэв.
Бүгд Найрамдах Беларусь Улс 9 сая гаруй хүн амтай, Ерөнхийлөгчийн засаглалтай улс юм. Монгол Улс Бүгд Найрамдах Беларусь Улстай 1992 оны нэгдүгээр сарын 24-нд дипломат харилцаа тогтоосон. Уламжлалт, найрсаг харилцаатай.
Монгол Улс Элчин сайдын яамаа 2020 оны тавдугаар сарын 24-нд Минск хотноо нээсэн. Монгол Улсаас Онц бөгөөд Бүрэн эрхт Элчин сайд Г.Байгалмаа долоодугаар сарын 28-нд Ерөнхийлөгч А.Г.Лукашенкод Итгэмжлэх жуух бичгээ өргөн барьсан.
Бүгд Найрамдах Беларусь Улс Элчин сайдын яамаа 2014 оны зургаадугаар сарын 30-нд Улаанбаатар хотноо нээсэн. Бүгд Найрамдах Беларусь Улсаас Монгол Улсад суугаа Элчин сайд М.Орда 2026 оны зургаадугаар сарын 5-нд Ерөнхийлөгч У.Хүрэлсүхэд Итгэмжлэх жуух бичгээ өргөн барьсан.
Бүгд Найрамдах Беларусь Улсаас төрийн тэргүүний түвшинд 2024 оны зургаадугаар сарын 1-4-нд анх удаа Монгол Улсад төрийн айлчлал хийж, “Найрсаг харилцаа, хамтын ажиллагааны тухай Монгол Улс, Бүгд Найрамдах Беларусь Улс хоорондын гэрээ”, “Монгол Улс, Бүгд Найрамдах Беларусь Улс хооронд 2024-2026 онд хэрэгжүүлэх хамтын ажиллагааны замын зураглал” зэрэг 12 баримт бичигт гарын үсэг зурсан.
Тусгаар тогтнолын ордон нь Беларусь Улсын төрийн албан ёсны хүндэтгэлийн ордон бөгөөд төр, засгийн өндөр түвшний ёслол, айлчлал, хурал уулзалт, дипломат үйл ажиллагааг зохион байгуулдаг гол байгууламж юм. Ордон нь тус улсын үндэстний соёлын үнэт өвд тооцогддог бөгөөд тогтсон цагт жуулчдад нээлттэй байдаг гэж ЕТГ-аас мэдээллээ.
