СӨҮЛ, 2026 оны зургаадугаар сарын 4 /Kyodo/. БНСУ-ын Гадаад хэргийн сайд Чо Хён Африкийн 11 орны Гадаад хэргийн сайд нартай цуврал ганцаарчилсан уулзалт хийж, хоёр талын харилцааг бэхжүүлэх, хамтын ажиллагааг өргөжүүлэх арга замуудыг хэлэлцсэн тухай тус улсын Гадаад хэргийн яамнаас мэдээлжээ.
Чо Хён даваа гарагт Сөүл хотноо болсон Солонгос-Африкийн Гадаад хэргийн сайд нарын уулзалтын үеэр Гана, Сомали, Танзани, Тунис, Кени, Ангол, Руанда, Бенин, Алжир, Сан-Томе ба Принсипи болон Ботсван улсын Гадаад хэргийн сайд нартай тус тус уулзсан байна.
Уулзалтын үеэр тэрбээр БНСУ-д айлчилсанд сайд нарт талархал илэрхийлсэн бол Африкийн орнуудын сайд нар энэхүү уулзалтыг амжилттай зохион байгуулж буйд нь баяр хүргэжээ. Түүнчлэн хүнд нөхцөл байдлыг үл харгалзан уулзалтыг товлосон хугацаанд нь зохион байгуулж, Африк тивтэй хамтран ажиллах амлалтдаа хүрснийг нь өндрөөр үнэлсэн байна.
Талууд эдийн засаг, батлан хамгаалах, далайн аюулгүй байдал, хөгжлийн хамтын ажиллагаа болон олон улсын тавцан дахь үйл ажиллагаа зэрэг өргөн хүрээний салбарт хамтын ажиллагаагаа өргөжүүлэхээр тохиролцсон байна.
Мягмар гарагт сайд Чо Хён мөн Африкийн гурван томоохон байгууллага болох Африкийн Холбоо, Африкийн Өвчнийг хянах, урьдчилан сэргийлэх төв болон Африкийн Хөгжлийн банкны төлөөлөгчидтэй өглөөний цайны уулзалт хийжээ.
Даваа гарагт болсон Гадаад хэргийн сайд нарын уулзалт болон мягмар гарагт зохион байгуулсан Солонгос-Африкийн бизнесийн форумд урилга хүлээн авсан 54 орноос БНСУ-аас гадна, Африкийн 50 орны Засгийн газрын төлөөлөгч, бизнесийн удирдагчид, шинжээчид оролцож, дэлхий нийтэд тулгамдаж буй асуудлуудад хамтдаа хариу арга хэмжээ авах, хамтын өсөлт хөгжилтийн төлөө хоёр талын хамтын ажиллагааг өргөжүүлэх арга замуудыг хэлэлцсэн байна.