Шинэ Делид мягмар гарагт “Cockroach Janta Party” хөдөлгөөний удирдагчдыг цагдаа нар баривчилсан байна. Тэд Сонгуулийн ерөнхий комиссын даргыг огцрохыг шаардан Жантар Мантар одон орны ажиглалтын төвийн хашааг даван оржээ.
Энэ сарын турш хөдөлгөөнийг дэмжигчид болон сөрөг хүчний бүлгүүд бараг өдөр бүр жагсаал зохион байгуулж байна. Жагсагчид сонгогчдын нэрсийн жагсаалтад оруулсан өөрчлөлтийг Ерөнхий сайд Нарендра Модигийн тэргүүлдэг BJP намын талд хийсэн гэж үзэж байгаа.
Сонгуулийн комисс аль нэг намд давуу байдал олгоогүй гэж няцааж, жагсаалтаас хасагдсан хүмүүс дахин бүртгүүлэх боломжтой гэж мэдэгджээ. BJP нам сөрөг хүчнийхнийг сонгуулийн үйл явцад үндэслэлгүй эргэлзээ төрүүлж, ардчиллыг сулруулахыг оролдож байна хэмээн буруутгасан.
Өнгөрсөн амралтын өдрүүдэд төлөвлөсөн жагсаалыг цагдаагийнхан хүч хэрэглэн зогсоож, удирдагчид болон олон мянган хүнийг саатуулсан. Даваа гарагт сөрөг хүчний зохион байгуулсан жагсаалд олон мянган хүн оролцжээ.
Делигийн цагдаагийн газар Жантар Мантарыг албан ёсны жагсаалын бүсээс хасч, гурван шинэ байршил тогтоосныг зарласан.
CJP хөдөлгөөний мэдээлснээр, удирдагчид Ашутош Ранка, Саурав Дас, Ажинкья Шинде нар 20 орчим идэвхтний хамт цогцолборыг буцаан жагсаалын газар болгохын тулд нэвтэрсэн бөгөөд баривчлагдсан.
Хөдөлгөөнийг үүсгэн байгуулагч Абхижит Дипке X сүлжээнд “Эсэргүүцлийн хөдөлгөөнийг мэдэгдэл гаргах замаар зогсоож чадахгүй” гэж бичжээ.
Энэ үйл явдал Модигийн хувьд улс төрийн томоохон сорилт болж байна.
Сонгуулийн комиссын дарга Гьянеш Кумарын хоёр орлогч нэрсийн жагсаалтыг шинэчлэх, бүртгэлийн журам болон цахим системтэй холбоотой асуудлаар дотооддоо санаа зовниж байгаагаа илэрхийлсэн тухай мэдээлэл гарсан.
Өнгөрсөн оноос эхэлсэн шинэчлэлийн хүрээнд 130 сая гаруй хүний нэрийг жагсаалтаас хассан. Үүнд нас барсан 28 сая, оршин суугаа газраа өөрчилсөн 63 сая, хаягийг нь тогтоох боломжгүй 30 сая хүн багтжээ.
Сөрөг хүчний намууд энэ өөрчлөлт лалын шашинт сонгогчид болон цөөнхөд илүү нөлөөлж байна гэж мэдэгдсэн ч комисс болон эрх баригч нам няцаажээ.
