КАРДИФФ, 2026 оны есдүгээр сарын 15 /Sky News/. Шотланд, Уэльс, Умард Ирландын тэргүүн сайд нар болох Жон Свинни, Рун ап Иорверт, Мишель О’Нил нар үндэстэн бүр өөрсдийн ирээдүйг өөрсдөө шийдэх, Их Британиас тусгаар тогтнох, цаашид Европын Холбоонд нэгдэх эрхтэй гэдгийг баталгаажуулсан харилцан ойлголцлын хамтарсан санамж бичигт гарын үсэг зуржээ. Уг баримт бичигт есдүгээр сарын 14-ний даваа гарагт Уэльсийн нийслэл Кардифф хотод болсон уулзалтын үеэр гарын үсэг зурсан байна. Уулзалтад тус өөртөө засан тохинох эрхтэй гурван улсын засгийн газрын тэргүүн нараас гадна Ирландын үндсэрхэг үзэлт “Шинн Фейн” намын дарга Мэри Лу Макдональд оролцжээ.
Санамж бичигт мөн сэргээгдэх эрчим хүч, “илүү хүчирхэг, шударга эдийн засгийг” бий болгох, Европтой харилцаагаа бэхжүүлэх зэрэг нийтлэг ашиг сонирхолд нийцсэн салбаруудад хамтран ажиллахаар төлөвлөж буйг дурдсан байна.
“Вестминстерийн эрин үеийн төгсгөл ойртож байна”
“BBC News” сувгаар мэдээлснээр, Их Британийн бүрэлдэхүүнд багтдаг дөрвөн улсын гуравт нь үндсэрхэг үзэлтэй улс төрийн намуудын төлөөлөл анх удаа засгийн газрыг тэргүүлж байна. Тухайлбал, Шотландад Шотландын үндэсний нам (SNP), Уэльст “Плайд Камри”, Умард Ирландад “Шинн Фейн” нам засгийн эрх барьж байна. Кардифф хотод болсон уулзалт нь эдгээр гурван улсын удирдагчдын анхны хамтарсан уулзалт ажээ.
Уулзалтад оролцогчид “улс бүрд гарч болзошгүй үндсэн хуулийн өөрчлөлтөд бэлтгэх, төлөвлөх, хэрэгжүүлэхэд нь дэмжлэг үзүүлэх”-ийг Их Британийн эрх баригчдад уриалжээ. Тэдний гарын үсэг зурсан баримт бичигт “Вестминстерийн эрин үеийн төгсгөл ойртож байна” гэж онцолсон байна.
Жон Свинни, Мишель О’Нил нар хэвлэлийн хурал хийх үеэр Их Британийн бүрэлдэхүүнээс гарах эсэх талаар бүх нийтийн санал асуулгыг ойрын хугацаанд явуулахыг уриалжээ.
Кардиффт санамж бичигт гарын үсэг зурсан тухай мэдээлэл гарсны дараа Их Британийн Ерөнхий сайд Энди Бёрнэмийн хэвлэлийн нарийн бичгийн дарга мэдэгдэл хийсэн байна. Тэрбээр мэдэгдэхдээ, Их Британийн засгийн газрын тэргүүн Шотланд, Уэльс, Умард Ирландад тусгаар тогтнолын асуудлаар бүх нийтийн санал асуулга явуулахыг дэмждэггүй бөгөөд “Их Британийг нэгтгэсэн холбоонд тууштай итгэдэг” хэмээн хэлснийг “Belfast News Letter” сонинд эш татан бичжээ.