ВАШИНГТОН, 2026 оны тавдугаар сарын 27. /ТАСС/. “Вегас Голден Найтс” баг Хойд Америкийн Үндэсний хоккейн лигийн аварга шалгаруулах тэмцээний хасагдах шатны хагас шигшээгийн цуврал тоглолтод “Колорадо Эвеланш” багийг өөрийн талбайд 2:1 харьцаагаар буулган авснаар Стэнлийн цомын финалд шалгарлаа.
“Вегас”-ын Марк Стоун (5 дахь минут), Коул Смит (55) нар, “Колорадо”-гийн Габриэль Ландескуг (58) нар шайб оруулсан байна. Харин “Вегас”-т тоглодог Оросын довтлогч Павел Дорофеев, Иван Барбашев нар гоол оруулаагүй, оновчтой дамжуулалт өгөөгүй бол “Колорадо”-гийн довтлогч Валерий Ничушкин гэмтлийн улмаас тоглолтод оролцсонгүй.
Ийнхүү “Вегас” баг хагас шигшээгийн 4 тоглолтод дараалан хожсоноор финалд шалгарлаа. Вегасчууд 2017/18 оны улирлаас хойш Үндэсний хоккейн лигт тоглож байгаа бөгөөд Стэнлийн цомын финалын цувралд 3 дахь удаагаа оролцох гэж байна. Одоо тус баг “Каролина” – “Монреаль” (цувралын харьцаа 2-1) багуудын хожсонтой нь цомын төлөө тоглох юм. Өмнө нь Невадагийн хоккейчид 2023 онд анх удаагаа Стэнлийн цомыг өргөж байжээ.
Лигийн аварга шалгаруулах тэмцээний дүнгээр “Вегас” баг Номхон далайн дивизионоос плей-оффт шалгарч, эхлээд “Юта” багийг 4:2-оор, “Анахайм”-ыг 4:2-оор тус тус хожсон байна. Харин “Колорадо” баг “Лос-Анжелес”-ийг 4:0-ээр, “Миннесота”-г 4:2-оор тус тус хожсоноор хагас шигшээд шалгарчээ.
Ташрамд дурдахад, “Флорида Пантерз” баг өмнөх хоёр цомыг авч байсан бөгөөд энэ улиралд плей-оффт шалгарч чадаагүй байна.